Reykjavík Mobility 21. útgáfa
Hæ Reykvíkingar
Ég hef verið að garfa í gögnum um nýskráningar fólksbíla til að reyna að átta mig á því hvar við stöndum í samanburði við aðrar þjóðir. Læt stuttan pistil þess efnis fylgja.
kv Jökull Sólberg
70% af nýskráðum fólksbílum eru bensín- eða dísilbílar í þriðja ársfjórðungi (fólksbílar). Langsamlega besti ársfjórðungurinn hvað varðar hlut hreinorkubíla. Samt ekki nema 30% af nýskráningum.
Bílaflotinn á langt í land með orkuskipti. Svona hefur þetta þróast. Aðeins rafbílar eru alveg grænir í akstri (fyrir utan mögulega metan- og vetnisbíla). Talsverð losun fylgir hinum.
Samkvæmt gögnum á Orkusetur.is hefur samanlagður hlutur raf- og tengiltvinnbíla verið 21%, 17% og 30% í nýskráningum fólksbíla síðustu þrjá ársfjórðunga. Höfuðborgarsvæðið hefur verið með um 20-30% hærra hlutfall en landsbyggðin. Í Noregi var hlutur rafbíla aftur á móti 54% á seinasta ársfjórðungi. Þar eru öflugar ívilnanir, en meiri fókus á rafbíla og minni á tvinn- og tengiltvinnbíla. (Ég set smá fyrirvara á gögnin frá Orkusetri, þau virðast ekki samræmast mánaðarskýrslum frá Samgöngustofu. Er að reyna að komast til botns í því.)
Nýskráðir bensín- og dísilbílarnir verða líklega ennþá á götunni árið 2036, sumir enn lengur. Þetta eru þúsundir bíla á hverju ári fyrir litla landið sem á Evrópumet í bílaeign per heimili. Árið 2036 hafa liðið 6 ár síðan við ætluðum að vera búin að helminga útblástur frá árinu 2017. Það eru góðar líkur að heimurinn verði kominn framúr 1,5° hækkuninni á þessu tímapunkti. Við berum hlutfallslega meiri ábyrgð á þessari þróun en aðrir. Það er einfaldlega af því við erum rík og höfum hreiðrað um stóriðju á síðustu 30 árum þó eflaust sé eitthvað af henni betur sett hér innan um vatnsfallsorku.
Samkvæmt mínum útreikningum verður hlutur raf- og tengiltvinnbíla ekki nema 42% af fólksbílaflotanum árið 2036. Er ekki einföld loftslagsafneitun að flytja þessar bensín- og dísilbifreiðir inn þegar aðrir kostir eru í boði? Tvenn rök:
👉🏻 Í fyrsta lagi sást eftir hrun að það er mikill sveigjanleiki í endurnýjun bílaflotans. Það er hægt að færa kostnað í viðhald og halda bara bílum lengur á lífi. Nota bara það sem við höfum og keyra minna. Á árunum 2009 og 2010 fluttum við inn færri en 2000 bíla á ári. Það sem af er ári hafa verið fluttir inn 2.200 raf- og tengiltvinnbílar.
Í öðrum orðum: Við höfum nýlegar sögulegar sannanir fyrir því að við þurfum ekki hina bílana. Það er hægt að lifa af nokkur ár án mikils bílainnflutnings. Við erum nýlega komin úr mikilli endurnýjunarsveiflu þar sem að meðaltali 13 þúsund bílar voru fluttir inn á ári á árunum 2016-2018. Nýskráning fólksbíla á árunum 2008-2018 var u.þ.b. 8.000 bílar á ári.
👉🏻 Í öðru lagi styttist í stóraukið framboð á rafbílum. Evrópusambandið er að herða verulega kröfur á framleiddan flota hvers bílaframleiðanda. Væntur akstur flotans sem er framleiddur og seldur þarf að vera undir ákveðið mörgum grömmum af CO2 í útblæstri per kílómeter. Framleiðendur eru að bregðast við þessu. Volkswagen er að opna nýjar verksmiðjur tileinkaðar rafbílum og Toyota ætlar loksins að færa sig í hreina rafbíla. Tengiltvinnbílarnir eru ekki nóg til að standast nýju viðmiðin.
Afhverju erum við að leyfa nýskráningar á bílum sem krefjast innfluttra orkugjafa? Árið 2020 mun framboð rafbíla stóraukast. Bönnum allt nema raf- og tengiltvinnbíla strax í dag.
Innlent
🚌 Einstaklega gott viðtal við fjóra fastráðna strætóbílstjóra sem eru allir innflytjendur. Hrós á Fréttablaðið sem hefur verið með mikið af vandaðri umfjöllun sem varpar ljósi á bíllaust þjóðfélag. Link
Erlent
🗽 Eftir vel heppnaða lokun fólksbílaumferðar á 14. stræti Manhattan eru fleiri og fleiri að velta því fyrir sér afhverju þetta sé ekki gert á allri Manhattan. Gott dæmi um svæði þar sem bíllinn tekur meira en hann gefur. Link
🎙 Podcast viðtal um bókina Invisible Women. Hönnun í samgöngum er mjög karllæg. Link
🛵 Yamaha er loksins að fara full force í örflæði. Mjög flott hjól. Smastarf við Gogoro um skiptanlegar rafhlöður og hleðslustöðvar. Link
🙅🏻♂️ Karlkyns Uber bílstjórar þéna meira, einfaldlega af því þeir keyra hraðar. Link
📍 Pittsburgh hefur boðið út Zipcar, hlaupahjól, rafhjól og hugbúnað til að tvinna þetta saman við almenningssamgöngur í eina heildræna lausn. Mjög áhugaverð nálgun á MaaS (mobility as a service). Link
Twitter: @jokull
Áframsendið á hvern sem er. Ekki hika við að svara þessum pósti með athugasemdum, þær berast beint til mín.