Reykjavík Mobility 16. útgafa
Hæ Reykvíkingar,
Þurfti að koma frá mér pælingum sem varða ljósastýringuna. Ný hjól frá norska póstinum, aukning í strætó, nýtt artwork, rannsóknir og alls konar. Njótið!
kv Jökull Sólberg
BTW: Endilega sendu mér línu um þig! Ég sé emailin ykkar en ég vil endilega vita meira 😁
Þeir sem tala fyrir skammvinnum úrbótum einkabílsins elska að vísa í hversdagslegan pirring sem almenningur tengir við á einhverju primal-pirrings-leveli; að vera að leita að bílastæði, að gefa öðrum forgang, að taka tillit til framkvæmda sem frestast og fleira í þeim dúr. Núna gengur þessi málflutningur út á snjallvæðingu umferðarljósa með tölvubúnaði og nemum sem besta umferðarflæðið og draga úr töfum. Ein af hugmyndunum er að ljósin taki mið af umferðarþunga og hafi lengri lotutíma þegar umferðin er þung, þ.e.a.s að skiptingar á milli grænt og rautt taki lengri tíma. Til þess að það gangi þarf að uppfæra ljósin og tengja þau saman.
Í nýrri greiningu frá Samtökum Iðnaðarins er gengið svo langt að varpa fram þeirri staðhæfingu í fyrirsögn að ljósastýring skili 80 milljörðum.
Í fyrstu setningu greiningarinnar er talað um að allur tími í umferð sé tímasóun. Af orðalaginu að dæma hafa ferðir fólks engan tilgang eða að biðtími sé á einhvern hátt óeðlilegur. Þetta orðalag er afhjúpandi: Samkvæmt SI er skylda yfirvalda að mannvirkin stíflist aldrei undan eftirspurn bílsins. Forsvarar bíla vilja tryggingu fyrir því að notkun hans sé óheft. Ef það er ekki gert þá er verið að sóa tíma einhvers.
Hvergi í skýrslunni er þess getið að Reykjavíkurborg hefur unnið að miðlægri samtengingu og stýringu á umferðarljósum undanfarin ár. Eflaust má efla og klára þá vinnu til að ábatanum sé náð.
SI kemst að þeirri niðurstöðu að það megi búast við 15% minni biðtíma. Hvergi er útskýrt hvaðan sú tala kemur eða á hverju hún byggir, þrátt fyrir að SI leyfi sér að tala um greiningarvinnu. Greiningin virðist fyrst og fremst felast í að telja klukkustundir og margfalda til að fá fjárhagslegan ábata.
(Viðar Freyr Miðflokksmaður ritaði fróðlega grein um þann ábata sem má ætlast af fullkomnari ljósastýringu með betri tilvísunum. Einnig rekur hann ágætlega sögu þessa kerfis, en það er augljóst að hann er að horfa inn í púströrið … telur réttast að sleppa alveg ljósum og fara beint í slaufur og mislæg gatnamót.)
Greiningu SI lýkur með þessum orðum: „Eru þar ótaldir aðrir ábataþættir á við minni loftmengun og sparnað í öðrum aksturskostnaði.“ Hvernig væri að reikna það sem gerist svo í kjölfarið á þessum fegrunaraðgerðum?
Að greiða fyrir umferð með einum eða öðrum hætti hefur þær augljósu afleiðingar að fleiri kjósa bílinn þar sem enn öðrum kostnaðarliðnum er haldið í skefjum: ferðatíma í þessu tilfelli. Með auknu umferðarmagni verður borgin dýrari í rekstri, óheilbrigðari, minna aðlaðandi og við frestum enn og aftur að takast á við loftslagsvandann.
Þegar fólk situr fast í umferð þá leitar hugurinn að þessum litlu skammvinnu sigrum: „Afhverju í andskotanum er ekki einhver tölva sem nemur það að það eru bara fimm bílar að bíða eftir grænu ljósi hinumegin en fyrir aftan mig eru 50 bílar? Þarf ég að forrita þetta kerfi sjálf?“
Það þykir sjálfsagt að nýta götur, bíla og aðrar fjárfestingar sem best. Þessar verkfræðiæfingar eru ekki tilgangslausar ef hægt er að draga úr biðtíma. En annars stigs áhrifin komast alltof sjaldan í umræðuna og þau eru mun alvarlegri en biðtími í umferð. Við viljum ekki að hlutfall bílsins hækki heldur lækki. Hvað er þá réttlætanlegt að gera til að ná því markmiði? Einhverjum þætti það réttlætanlegt að láta kjurt liggja ef það eykur umferð, eins og í tilfelli ívilnana rafbíla og snjallvæðingu umferðarljósa. Í báðum tilfellum er það opinber kostnaður eða tekjutap sem tengist framkvæmdinni. Hver ætti reglan að vera? Að mínu viti eigum við að setja innviði bíla í algjört viðhald. Nýfjárfestingar þurfa að bíða betri tíma þar til við höfum náð niður umferðarmagninu þannig að við treystum okkur til að uppfylla ákvæði Parísarsáttmálans. Þau markmið eru gríðarlega metnaðarfull, krefjandi og að sama skapi nauðsynleg. Umferðarverkfræðingarnir þurfa að fara að hugsa um aðgerðir sem draga úr umferð í stað þess að auka hana.
Innlent
🚌 Mikil aukning í strætó; 6% á fyrri helming ársins. Það væri tvöföldun á sex árum ef sú þróun helst. Link
✍️ Halldór skopteiknari hjá Fréttablaðinu: „Þá vitum við það. Stytting vinnuvikunnar nær hálfa leiðina til Mosó“. Góður. Link
💁🏻♂️ Haraldur Karlsson samgönguhjólari náði skemmtilegu myndbandi af framúrakstri. Hjólið nær bílnum á gatnamótum. Link
💵 Formaður Stúdentafélags HR vill ekki gjaldskyld bílastæði við skólann. En þetta eru ekki réttir aðilar til að ræða bílastæðamálin við. Réttara er að ræða við þá sem reka skólana eða eiga bílastæðin. Þar er ábyrgðin og þar er verið að mismuna fólki eftir því hvaða fararmáta það velur. Þar er líka tækifæri til að afla tekna. Link
⚡️ Ísorka ætlar að kæra Orku náttúrunnar til samkeppniseftirlitsins. Sýnist þetta ekki vera úr lausu lofti gripið. Kannski er tenging við OP3 en ég nenni ekki að finna hana. Link
📈 Nýjar tölur frá Hagstofunni, teknar saman af Guðmundur Herði, sýna að bílaeign heimila er aftur á leiðinni upp síðan 2014. Link
Erlent
📓 Lögfræðirannsókn um sérstöðu og fríðindi einkabílsins í regluverki Bandaríkjanna. Link
😲 Plat QR kóðar á deilihjólum taka við greiðslum. Einskonar „phishing“ attack. Link
🏭 Umhverfisvænn bíll er ekki til. Eitthvað í kringum 4,4% af útblæstri heimsins hlýst af framleiðsluferli bíla. Bílaiðnaðurinn býr til hagkerfi. Hversu stór hluti af lausn loftslagsvánnar felst í að draga úr framleiðslu? Link
📮 Pósturinn í Noregi hefur hannað eigin burðarhjól. Fyrir mitt litla líf skil ég ekki afhverju það eru pedalar á þessu tæki. Gefið fólkinu bara ígjöf og fóthvílur. Það er engin sérstök dyggð í því að snúa pedulum. Frábært framtak engu að síður! Link
🚲 Leiguhjólaframleiðandinn PBSC (sem gerði WOW hjólin) er komin með ný rafhjól. Ekki nógu gott hjól af þessu Twitter review að dæma. Link
Myndin
Kjartan Hreinsson fangar iðnaðarfegurð í ljósmyndum og það sem stangast á í henni; ljótleikinn í útfærslunni og fegurðina í hugmyndafræðinni. Þessi einfalda mynd greip mig. Tómt bílastæði og klossaleg blokk innan um einhvern daufan gróður sem er unmistakably íslenskur.
Twitter: @jokull
Áframsendið þetta á hvern sem er – það hjálpar dreifingu og kynningu.
Ekki hika við að svara þessum pósti með athugasemdum, þær berast beint til mín.